ភ្នំពេញ៖ នាយខណ្ឌរដ្ឋបាលព្រៃឈើភ្នំពេញ លោក គាំ សីហា បានបញ្ជាក់ថា លោកនឹងចាត់ឱ្យក្រុមការងារចុះទៅត្រួតពិនិត្យ និងចាប់ស្វាដែលដេញខាំសិស្សានុសិស្ស និងពលរដ្ឋដើរឆ្លងកាត់ត្រង់ស្ពានថ្មើរជើងស្តុបសន្ធរម៉ុក។

ថ្លែងប្រាប់អ្នកសារព័ត៌មាន EAC តាមទូរសព្ទ លោក គាំ សីហា បានបញ្ជាក់ថា ស្វាទាំងនោះអាចទំនងជាបែកហ្វូងពីរមណីយដ្ឋានវត្តភ្នំ ហើយវាភាគច្រើននៅកន្លែងណាដែលមានមនុស្សផ្តល់នំចំណី។

លោកបាននិយាយថា៖ «ខ្ញុំនឹងឱ្យគេចុះទៅមើលភ្លាម ជួនកាលវាអាចនៅហ្នឹងតែមួយភ្លែត វាអាចនឹងទៅណាបាត់ទៀត»។

បើតាមនាយខណ្ឌរដ្ឋបាលព្រៃឈើភ្នំពេញ ក្រុមការងារនៃរដ្ឋបាលព្រៃឈើភ្នំពេញ តែងតែចុះទៅចាប់ និងប្រមូលស្វាដែលកាចៗ ហើយដេញខាំពលរដ្ឋ ចំនួន២ដងក្នុងមួយឆ្នាំ ដើម្បីធានាសុវត្ថិភាពពលរដ្ឋ ជាពិសេសភ្ញៀវទេសចរ។ ចំណែកស្វាដែលស្លូតៗ អាជ្ញាធរបន្តទុកវាឱ្យរស់នៅតាមបែបធម្មជាតិនៅរមណីយដ្ឋានវត្តភ្នំ ដើម្បីទាក់ទាញភ្ញៀវទេសចរ។

លោកគូសបញ្ជាក់ថា ស្វាដែលមានអាយុចាប់ពី៥ ទៅ៦ឆ្នាំ អាចនឹងមានសភាពកាច។ បើតាមលោក គាំ សីហា ស្វាដែលអាជ្ញាធរចាប់នោះ គឺអាជ្ញាធរបញ្ជូនទៅរស់នៅក្នុងសួនសត្វភ្នំតាម៉ៅ។

សូមរំលឹកថា កន្លងមកសត្វស្វាដែលកាចមួយចំនួនក៏ធ្លាប់ត្រូវបានចាប់យកទៅលែងនៅតំបន់ធម្មជាតិ ដោយសាររំខានដល់ពលរដ្ឋរស់នៅក្នុងទីក្រុងភ្នំពេញ៕

^{PHOTO: Rangsey}